بسم الله الرحمن الرحيم
lesson 2
مممممم ... طبعا الدرس اللي فات كان كله كلام نظري والسلام !!!
بس والله مهم جدا تعرف الكلام ده .. اهم حاجه الأساسيات عشان تبقى فاهم تكنيك الجيتار ....
طيب النهارده بردو هبقى نظري وفي شغل عملي بسيط ... بس في حاجه مهمه قوي
دلوقتي هقوللك لو عايز تشتري جيتار تعمل ايه ...... اولا عشان الراجل مينصبش عليك .. مهو شايفك زبون
طبعا حقه ينصب عليك ... وغير كده عشان متتدبسش في جيتار خربان يقرفك طول عمرك
بصوا بقى و ركزوا معايا قوي .....
اولا انت لو مبتدأ ولسه عايز تجيب جيتار جديد بقى وفرحان قوي ... لازم تجيب جيتار رخيص كلاسيك .. وكلاسيك يعني 3 اوتار نايلون و 3 اوتار معدن
صح كده ؟ ... طيب في اماكن كتير ممكن تجيب منها جيتار .. مثلا شارع محمد على .. اللي في العتبه ده .. في اول الشارع هتلاقي محلات
كتير قوي بتاعت جيتارات ... طيب اول متنقي شكل الجيتار اللي يعجبك .. طبعا من الاخركده متركزش في النوع .. يعني متركزش في ماركه الجيتار
وانت بتجيب من شارع محمد علي .. لانه من الاخر كل الجيتارات اللي هناك فرز 15 .. اهم حاجه تجيب جيتار شكله نضيف .. وزنه خفيف ..
وحظ 100 خط تحت كلمه وزنه خفيف ده ... في ناس بقى بتعمل نفسها ناصحه وتقوللك لا الجيتار اللي خشبه جامد وتقيل ومتين بيبقى احسن
لا طبعا اللي يقول كده يبقى جاهل ومبيفهمش حاجه .. لانه في نظريه بتقول ان كل ما وزن الجيتار يقل .. (الكلاسيك مش الالكتريك )
كل ما يبقى الصوت نقي اكتر ... عشان كده عملوا جيتارات silent من غير صندوق صوت . وعشان كده عملوا جيتارات من البلاسيك .
طبعا الحاجات ده غاليه .... المهم هتجيب جيتار قولنا شكله حلو .. خفيف .. واياك تجيب جيتار اسمع Power beat ..
خلاص نقيت الجيتار ؟ ... طيب ابتدي بقى جربه اخبط الاوتار بصوابعك كده عادي خفيف .. شوف في صوت نشاز وزنه رخمه ولا لا ..
مفيش صوت زنه ؟ الحمد لله الجيتار كويس .. طبعا مع ذلك جيتار فرز 15 بس المهم تتدرب عليه ... خلاص كده الراجل قللك 250 جنيه يا كابتن
بالشنطه .. ده شنطه من التوكيل .والجيتار من التوكيل . جامد جدا مش هتلاقي زيه ... كلله انت فاكرني زبون ؟ كل الجيتارات ده معموله تحت السلم في الصين
... فاصل معاه واقرفه وادفع اقل ما يمكن ......................................
خلاص جبت الجيتار .......
هتعمل بيه ايه بقى ؟؟؟ 
اول متروح البيت كده وانت مبسوط تنزل البرنامج اللي على اللينك ده Guitar Tunerماله بقى البرنامج ده ؟
البرنامج ده اسمها guitar tuner في ال 6 اوتار من اول وتر نايلون لحد اخر وتر معدن .. صوت كل واحد فيهم المفروض يبقى عامل ازاي
يعني النغمه بتاعت كل وتر ... اه مهي مش كفته .. لازم تظبطهم ... تظبطهم ازاي بقى ؟؟
في البرنامج دول زي ما انا دايس على الصوره كده .. ده صوت اول وتر من تحت (مي - Mi ) تيجي بقى على ال tuner أللي في الجيتار
اللي هو فوق الجيتار خالص .. تلف اول وتر ( تشد او ترخي ) لحد متجيب نفس النغمه بالظبط ...
وتعمل كده في وتر وتر لحد ما تعمل ال 6 اوتار .......... هييييييييه خلاص اتظبطوا ....
تمام قوي كده ......... ملحوظه :- في طرق كتيره ممكن تتون بيها الجيتار بتاعك .. هشرحها كلها بالتفصيل مع الوقت ... الكلام بيجر بعضه يعني
................
ننتقل دلوقتي لماركات الأوتار .... لو حبيت تجيب طقم اوتار نضيف .......
طبعا انا هقولك الأسامي اللي هتلاقيها في مصر .. وبرره مصر بردو في الدول العربيه
اول نوع واجمد نوع وهو اللي انا بستخدمه طبعا
D'addario >>>> اجمد واغلى نوع ممكن تلاقيه في مصر وفي العالم
تاني نوع
GHS >>>> ده نوع امريكي حلو جدا برضو .. هتلاقي الطقم ب 70 جنيه .. فاصل وخده ب 65
تالت نوع
la bella >> نوع ايطالي متهيألي وغالي بردو هتلاقيه ببتاع 90 جنيه مثلا
رابع نوع
Yamaha >> نفس سعر ال ghs او ارخص منه بشويه .. ب 60 تقريبا
خامس نوع
>> Pyramids >>> وده نوع الماني .. كويس بردو و رخيص ب 40 او 50 بالكتير
طبعا اي نوع غير دول تلاقيه في مصر .. يبقى زباله
................
طبعا ممكن تشتري ريشه للجيتار (pick) بس بلاش منها دلوقتي لان ده ليها حوار تاني هشرحه
...............
اهم حاجه بقى النهارده ممكن تتعلمها في
ازاي تقرأ التاب ..... how to read the tabs
يعني ايه تاب في الاول ؟
ده طريقه عباره عن ارقام .. سهله جدا بيستخدموها بدل النوته .. لان النوته ليها علامات موسيقيه وحوارات كتيره (هشرح النوته بعدين)
طيب ده بتساعدك انك مثلا سمعت اغنيه اجنبي وعايز تعملها بس مش عارف ازاي ... تروح داخل على الموقع ده
وكاتب اسم الاغنيه و هتلاقي التاب بتاعتها
طيب ازاي بقى تقراها
هنبتدي نقرأ التاب من الشمال لليمين
كل جزء عباره عن 6 خطوط .. تمام كده ؟ كل خط عباره عن وتر ..
اول خط من تحت هو اول وتر من فوق في الجيتار
يعني الوتر المعدن اللي فوق هو عباره عن اول خط تحت
واول خط من فوق هو عباره عن اول وتر من تحت
يعني اول وتر نايلون هو اول خط من فوق
وطبعا بالتدريج
الصوره ده هتوضلحك اكتر
طيب فهمنا الخطوط ... ايه بقى الارقام اللي مكتوبه على الخطوط اللي هنا
هنقرأ الارقام من الشمال لليمين يعني رقم 5 .. يعني الوتر اللي فوق العلامه الخامسه في الجيتار ..
وبعدها 8 ... يعني الوتر اللي فوق بردو العلامه رقم 8
وبعدها 5 .. يعني تاني وتر من فوق العلامه رقم 5
وهكذا
ملحوظه .. الوتر اللي فوق اسمه (مي .. او E )
الوتر اللي تحتيه اسمه ( لا - او A )
الي تحتيه اسمها ( ري - او D )
اللي تحتيه ( سول - أو G )
اللي تحتيه (سي - او B )
اول واحد من تحت ( مي - أو E )
يعني اول وتر من تحت واول وتر من فوق اسمهم مي ... واحد فيهم مي بس طبقه عاليه(جواب) والتاني مي بس طبقه منخفضه (قرار)
...................
مثال على ال tab
E---------- String 1
B---4------ String 2
G---------- String 3
D---------- String 4
A---------- String 5
E---------- String 6
يعني العلامه الرابعه الوتر رقم 2 من تحت زي الصوره كده
مثال تاني
E-------- String 1
B-------- String 2
G-------- String 3
D-------- String 4
A---0---- String 5
E-------- String 6
يعني الوتر رقم 2 من فوق .. اضربه من غير ما تحط صباعك على اي علامه على الجيتار
مثال كمان
E------------- String 1
B------6------ String 2
G--5---------- String 3
D-----------0- String 4
A------------- String 5
E------------- String 6
يعني الوتر رقم 3 من تحت العلامه رقم 5
وبعد كده تاني وتر من تحت العلامه رقم 6
وبعد كده تالت وتر من فوق بدون ما تحط صباعك
لازم تحفظ اسامي الاوتار .. انا مش هفضل اقول اول وتر من فوق وتالت وتر من تحت ... ده شغلانه ...؟
اتدرب بقى على التاب دية
E-1----------------- String 1
B---------8--------- String 2
G-----7------------- String 3
D-------------2----- String 4
A------------------- String 5
E----------------12- String 6
طلعها انت واعملها على الجيتار ...... اتدرب عليها كتير ..
المهم عرفت تحط صباعك ازاي على الجيتار ؟؟ استخدم دلوقتي اي صباع .. لحد ما تفهم الدرس الجاي ازاي تعزف صح على الجيتار
................ سلام .
GuiTar Freak
الأربعاء 22 أغسطس 2007 - 14:32
