عدد الرسائل : 50 العمر : 36 تاريخ التسجيل : 19/08/2007
موضوع: LESSON I الإثنين 20 أغسطس 2007 - 13:46
lesson 1
بسم الله الرحمن الرحيم
اقدملكوا سلسله لدروس الجيتار من شغلي الخاص .... في الدروس ده هشرحلكوا ازاي تعزفوا على الجيتار بكل الطرق وجميع انواع الموسيقى اللي ممكن تتعزف على الجيتار سواء شرقي او غربي (سبانيش وفلامينكو - كلاسيك - تانجو - بلوز ... الخ) - معلومه صغيره :- انك تبقى محترف في الجيتار ده يعتمد على حاجتين اساسيتين .. اول حاجه الموهبه .. ادينا طبعا شيفين في الشوار تلت تربع الشعب المصري ماسكلي جيتار وحاطه على كتفه وماشي بيه والربع التاني بيتفرج عليهم طبعا مش كل ما حد يمسك جيتار ده معناه انه بيعرف يعزف عليه ... وطبعا اي حد مش فاهم في الجيتار بينبهر اما يلاقي واحد ماسك جيتار وقاعد يدب كوردات ورا بعض وهو مش فاهم حاجه وعمال يغني عليها والسلام ... والبنات تتلم حواليه بقى والحركات ده طبعا .. عشان تتعلم جيتار لازم تبقى بتحبه لنفسك مش عشان حاجه تانيه .. ولازم يبقى عندك الموهبه .. واذن موسيقيه وهتشف الموهبه وسط دروسنا .. متستعجلش
تاني حاجه بقى مهمه هي التدريب .... ناس كتير قالتلي ان الجيتار 10% موهبه بتتطور ب 90% من التدريب يعني من الاخر اتدرب اتدرب اتدرب واهري نفسك تدريب لما تقول يا بس ومتستعجلش على حاجه
ملحوظه :- الدروس دية مقدرش اقول للمبتدئين بس .. لا لاي حد عايز يتعلم جيتار لانها بتقوله كل حاجه عن الجيتار ومعلومات قيمه جدا واما تخلص الدروس دية بالمجهود الشخصي هتقدر تطور نفسك وتوصل للاحتراف ... طبعا كلمه احتراف ده كبيره عليا وعليكوا لااننا مشوفناش محترفين في مصر اصلا ...
كفايه رغي بقى ونبتدي بشرح اول درس وهو الجيتار عباره عن ايه ؟
ده صوره بتوضحلك تركيب الجيتار سواء كلاسيك او اليكتريك .. وهنشرح ايه انواع الجيتار عشان نبقى فاهمين
head :- راس الجيتار من الاخر :] .. فيها بيبقى موجود التونر tuner:- ده بقى الجزء اللي بيشيل اول اطراف الاوتار ومنه تقدر تظبط التون بتاع الجيتار عشان يبقى مظبوط .. طبعا تظبط التون ليه حوار تاني هشرحه بعدين (الحوار مش سلق بيض يعني) Nut:- ده بيسموه في السوق ب أنف الجيتار .. مهم قوي لان الاوتار بتتشال عليه هو وجزء تاني تحت هشرحه .. fret :- ده السنون المعدن اللي بتشوفها على المسطره بتاعت الجيتار .. طبعا محطوطه بدرجه معينه ومتقاسه بالمللي عشان تديك النغمه المطلوبه finger board :- ده اللي بنسميها المسطره position marks:- العلامات البيضاء ده مهمه جدا بتفيدك كتير قوي في العزف .. اول علامه بتبقى في المسافه رقم 5 واللي بعدها 7 واللي بعدها 9 واللي بعدها 12 طبعا مهم عشان وانت بتعزف متنساش انت في انهي موقع بالظبط على الجيتار .. ولو سرحت وانت بتعزف تقدر ترجع مظبوط على العلامه من جديد
بعد كده هنلاحظ ان في الجيتار الكلاسيك في صندوق صوت بينما الالكتريك مفهوش ... وبعد كده في bridge ده الجزء التحتاني اللي بيشيل الاوتار طبعا ليه ارتفاع معين عشان الاوتار متخبطش في ال frets في الاخر Output jack طبعا في الالكتريك عشان توصله بالامبليفاير وكذلك في جيتارات اسمها acoustic بتتوصل زي الالكتريك تمام
دلوقتي نشرح انواع الجيتار عشان نبقى فاهمين الفرق
اول نوع الجيتار الكلاسيك او اللي بيسموه spanish guitar وده مش تعبير خاطئ ولا حاجه بس نقول كلاسيك احسن
ده بيبقى فيه 3 اوتار من ماده النايلون .. و 3 اوتار معدن بنسميهم اوتار bass او folk
تاني نوع هو الجيتار ال folk او steel guitar
ده بيبقى زي الجيتار الكلاسيك تمام بس ال 6 اوتار كلهم معدن وفي بعض الاحيان بيبقى صندوق الصوت بتاعه ضخم شويه زي الصوره ده
وعلى فكره مش شرط يبقى شكله عامل كده ... ممكن يبقى زي الكلاسيك عادي واوتاره معدن يبقى فولك بردو ...
تالت نوع اسمع acoustic guitar
ده بقى زي الجيتار الكلاسيك بس الفرق بقى ان جواه مايك داخلي بيكبر الصوت تقدر توصله ب سماعات او تدخله على ال Mixer وبتقدر تتحكم في الصوت تعللي او توطي او تعللي ال Bass او توطيه ... عيشه تانيه يعني وبيبقى غالي شويه عن الكلاسيك
طبعا شيفين الحته اللي فوق ده هي اللي بنتحك منها في الصوت
رابع نوع Semi-acoustic guitars او أل Silent guitars
ده من الاخر جيتار فاجر للمحترفين فقط .. في منه اوتاره نايلون وفي منه اوتاره كلها معدن .. مفهوش صندوق صوت زي الالكتريك وبتقدر وانت بتعزف تضيف مؤثرات صوتيه زي صدى الصوت وحاجات تانيه كتير .. في منه اشكال كتير .. لو نفتكر كليب تامر حسني بعيش كان تامر حسني ماسك واحد زيه .... طبعا لازم يتوصل ب الامبليفاير عشان مفهوش صندوق صوت اصلا ...
وادي صوره ليه ... في منه اشكال كتير طبعا مش كله نفس الاستايل ده
خامس نوع electric guitar
جيتار كهرباء لازم بتوصل بالامبليفاير ... ليه امكانيات كتير .. والصوت اللي بنسمعه في الاغاني بتاع الالكتير ده كله عشان بيتوصل ب امبليفاير فيه effects ... طبعا انا مليش في الاكتريك قوي ومقدرش ارغي فيه .. على العموم ده صورته
اخر نوع بقى اسمه Bass guitar
ده عباره عن 4 اوتار فقط معدن (bass) .. مهم جدا في اي فرقه يبقى فيها بيزست لانه بيملى في ارضيه الاغنيه جامد ... وده برره الدروس بتاعتنا
تاني حاجه هتتعلمها النهارده هي ازاي تمسك الجيتار في طرقتين تمسك بيهم الجيتار .... اول حاجه الطريقه الكلاسيكيه .. بص على الصوره كده ... المسكه ده اتعلمتها في الدراسه الاكاديميه فقط
بيبقى ضهرك مفرود .. حاطط رجلك الشمال على حامل صغير كده او صندوق ليه ارتفاع معين .. حاطط الجيتار على رجلك الشمال .. زي الصوره
تاني طريقه وهي العادي يعني اللي كلنا بنمسكها في الشوارع
زي الموززه ده مهي ماسكه الجيتار 00 مع ملاحظه ان الجيتار مش مايل لفوق قوي .. ومش مايل لتحت .. يعني في وضع افقي او اعلى سنه...
حط رجل على رجل لو تحب .. متحطش انت حر .. انت و دماغك ............
في طبعا طريقه تالته وانت واقف بقى ... لازم يبقى في حزام اللي بيشيل الجيتار .. زي الصوره كده
طبعا هتقوللي انت كل اللي بتجيبهم مزز كده ليه ؟؟ .... هقوللك عشان اخلي الشباب يحبوا الدروس ديه واهو كل يوم من ده
يالله كفايه قوي النهارده لحد كده .......... سلام
عدل سابقا من قبل في الأربعاء 22 أغسطس 2007 - 14:37 عدل 2 مرات
روميو الإدارة
عدد الرسائل : 82 العمر : 41 تاريخ التسجيل : 05/08/2007
موضوع: رد: LESSON I الثلاثاء 21 أغسطس 2007 - 13:53
الله عليك يا أبو حميد
درس جامد جدا وقصدي علي الدرس مش علي البنات يا سيدي ههههههههههههه
كدا بقي انا أول واحد هتابع معاك الموضوع دا .. وخلي بالك اني احتمال قريب أجيلك يوم عاشن تشتريلي جيتار .. بس استني لما أعمل جمعيه عشان أجيب تمنه هههههههههههه
بجد درس هايل جدا ومنتظرين ابقي الدروس يا باشا
GuiTar Freak
عدد الرسائل : 50 العمر : 36 تاريخ التسجيل : 19/08/2007
موضوع: رد: LESSON I الأربعاء 22 أغسطس 2007 - 14:35
يا باشا ده انت تنورني .. ده انا انزل معاك اشتري دبابه كمان مش جيتار لو حبيت .... واستنى بقيت الدروس بقى
الإثنين 20 أغسطس 2007 - 13:46
